تبلیغات
Qaynaq - حسنلی تپه سی
زبان و ادبیات توركی

حسنلی تپه سی

نویسنده :Qaynaq
تاریخ:سه شنبه 15 آذر 1390-09:31 ب.ظ

حسنلی تپه سی

 یازان: حسین واحدی



غربی آذربایجاندا چوخلو تانینمامیش و ده یرلی تاریخی اثرلر واردیر. اونلاردان بیری اولان حسنلی تپه سی 6 مین ایل دوغوش (میلاد) دان اؤنجه یه قاییدان تاریخی واردیر. بو ده یرلی  تاریخی اثر تکجه آذربایجان بؤلگه سینده یوخ، ایرانین باشا- باشیندا تایسیز بیر اثر ساییلیر. حسنلی تپه سی اورمو گؤلونون گونئی باتیسیندا (جنوب غرب-ینده)  یاشیل لیق سولدوز یوردوندا یئرله شیب دیر. بو تپه 7 کیلومئتر سولدوز شهریندن آراسی واردیر. حسنلی آدینی بو آددا اولان کندین یاپیشیغیندا اولماسیندان آلیب دیر. تپه نین قازینتی لاری 1313 دن باشلاندی. بو قازانتی لار اوزوندن بیر نئچه ساخسی قاب ـ قاجاق چئشیتلی شکیل لرده تاپیلدی. 1336ـ دا بیلیمسل (علمی) و تخصصی آختاریش لار بیر ایرانلی- آمریکالی هیئت ین آختاریش ایله باشلاندی. بو آختاریش ایله قازینتی لاردا بوزوقلوق لارین (خرابه لرین) آلتیندان بیر شهر- قالا تورپاق لار آلتیندان اوزه چیخدی. اوزمان لارین (متخصص لرین) دئدیگینه گؤره بو شهر- قالا «ماننا» قومونا عایید دیر. بو دیکینتی نین، ائولرین و معبدلرین دووارلارینین تملی (پایه سی) داشدان دوزه لیب دیر. دووارلارین اوستونده 40 سانتیمتر لیینده اوزوناسی، 23 سانتیمترلیینده ائنی و 14 سانتیمتر قالینلیغیندا اولان کرپیج لر قویولوبدور.

حسنلی تپه سیندن 1313 دن، 1358 نجی ایله کیمی، ایرانلی و آمریکالی آرکولوق لارین آختارماسی نتیجه سینده چئشیتلی ساواش آراجلاری او جومله دن؛ قیلینج، خنجر، اوخ، دمیر و بورونز جینسیندن اولان اوخ باشلیق لاری، مینلجه ساخسی قاب- قاجاقلار، تاریخی، کولتورل و صنعت (هنر) باخیمیندان ده یرلری اولان، سوموکدن، شوشه دن، دمیردن، داشدان و ساخسی دان اولان شئی لر تاپیلیب دیر و ایران، آذربایجان، آمریکا، فرانسه و باشقا اؤلکه لرین موزه لرینده ساخلانیلیر. حسنلی تپه سینین ان اؤنملی (مهم) تاپینتی سی و دونیادا و اسکی تانیمادا اؤزل (ویژه) و اؤنملی (مهم) یئر آلان شئی  قیزیلدان اولان حسنلی قابی دیر. بو قابین چکی سی 950 گرم ، اوزوناسی 21 سانتیمتر،  قوطرو 25 سانتیمتر دیر و آغیز چئوره سی 61 سانتیمتر دیر. بو قیزلدان اولان قاب تئهرانین قدیم ایران موزه سینده ساخلانیلیر. بو قاب گؤزلری اؤزونه طرف چکن بیر قاب دیر و اوستونده چوخ اینجه لیک ایشلر آپاریلیب دیر و گؤرکملی (مجلل) ایش لردن اوزاق قالیب دیر. حسنلی تپه سیندن تاپیلان  قیزیل قابین قدیم لیغی 800 ایل مسیح دوغوشوندان اؤنه قاییدیر. بو آدلیم قابین بدنه سینده چوخلو اویولموش ناخیش لار واردیر و بیر حماسی داستانی دئمک ایمکانی اولا بیلر.

بو تپه دن آرتیق باشقا ده یرلی تپه لرده باتی (غربی) آذربایجانی  توریزم باخیمیندان اؤلکه ده بیرینجی یئرلرده اولماسینا ندن اولور و گرک مسئول لار و کوتله بو اثرلرین تانینماسیندا و اونلاری قوروماقدا دوزگون ایشلر ائتسینلر. توز- تورپاغی و دومانی حسنلی تپه سیندن گؤتوروب اونون یئرینه توریست و موسافیر گتیرمه لییک و اورادا اولان کوتله نین (جماعتین) ایقتیصادینادا یاردیم ائتمه لیییک. اومود ائدیرم یاخین گله جک ده گؤزل غربی آذربایجان توریزم باخیمیندان ایراندا بیرینجی یئره ال تاپاجاق دیر.



Şəkil:Manna dövləti e.ə. IX-VIII əsrlərdə.jpg

Şəkil:Həsənli qab 2.jpg

Şəkil:Həsənli qab 1.jpg






نوع مطلب : گردشگری